Thursday, 30 November 2017

Garnier: Life of Thomas at Pontigny

Lines 3611 - 3675
Stanzas 723-735

723
Dous anz a Punteigni li sainz hum sujorna.
Mais a clerc ne a lai sun estre ne mustra ;
Neïs a ses privez, quanque pout, se cela.
Les eises de sun cors fuï e esluigna,
3615 E el servise Deu jor e nuit se pena.

724
Dunc comença sun cors durement a grever
E les grosses viandes, chous e nes, a user ;
E les bons mes se fist priveement embler,
E sis faiseit as povres en la vile porter.
3620 Car si clerc l’en volsissent, sel seüssent, blasmer.

725
Mult sovent le blasmeient que tel vie meneit ;
Kar il ert granment fiebles e trop se destraigneit.
Les testes a ses hummes, ço diseient, coupeit :
Cacié erent pur lui, e se il lur moreit,
3625 Ja mais en lur païs un sul n’en revendreit.

726
Iluec curreit un’ewe de mestier en mestier.
La se baignout les seirs pur sa char refreidier.
A Willame de Capes se fist un seir guaitier.
« Sire, vus nus volez, fait il, les quers trenchier. »
3630 Ainc puis ne l’i mena, quant l’en volt castïer.

727
Mais l’une de ses faces idunc li a festri,
Si que dedenz la buche tresqu’as denz li purri ;
Mult grant enfermeté lungement en suffri.
Dous osselez l’en traist Willames, sil guari.
3635 Pur ço qu’um le seüst, amentiveir l’oï.

728
Une nuit quant mult fu penez en oreisun,
E il fu endormiz, vit en avisiun :
Entre lui e le rei, quil haï senz raisun,
Erent devant la pape en plait e en tençun ;
3640 Tuit li cardenal erent contre li a bandun.

729
E ço li fu avis voleient li tolir
Hors del chief a lur deiz les oilz e effuïr.
L’apostolies tut suls le voleit maintenir,
Ki bien cunut sa cause ; mais nel poeit oïr,
3645 Car lur criz e lur noise l’orent fait enroïr.

730
Al consistorie od lui ne remist nuls hum vis.
Ocisëur felun li furent dunc tramis ;
La corune li unt, ço li esteit avis,
A lur espees rese. – Bien li ad Deus pramis
3650 Qu’il sereit en sa cause pur saint’iglise ocis.

731
Uns des convers as monies (ne le m’unt pas nummé)
Out mult esté grevé de grant enfermeté
E out d’idropisie le ventre mult enflé.
La mere Deu priout e iver e esté
3655 Qu’ele preiast sun fiz qu’il li donast santé.

732
Tant requist nuit e jur la mere al creatur
Qu’ele li tramesist santé de sa dolur,
Qu’a lui vint une nuit la dame de dulçur ;
Dist li que il alast a Thomas senz demur,
3660 Fesist li manïer sun ventre tut entur.

733
Li freres l’endemain al saint humme en ala,
E en sun escritorie, la u il le trova,
Pur la pitié de Deu tant li quist e preia
Que li ber od sa main sun ventre mania ;
3665 E cil li traist par tut la main e demena.

734
A beivre li duna, mais ne sai quei, de fi.
Guaires ne demura que li freres chaï,
Venim e pureture, grant merveille, vomi,
E jut mult lungement. Tuz greilles sus sailli.
3670 Par les mains al saint humme de s’enferté guari.

735
Mulz malades guari de sun relief demaine.
La fille a un riche humme en devint tute saine
Qui out esté fievrose mainte lunge semaine.
N’out el païs nul humme si plain de fievre vaine,


3675 Par sun relief n’eüst santé tute certaine.


No comments:

Post a Comment